top of page
搜尋

頸痛好犀利，要唔要即刻照 MRI 睇清楚？應該幾時照先啱時機？

  • info678779
  • 5天前
  • 讀畢需時 2 分鐘

當客人條頸痛得好犀利嘅時候，都會諗：「會唔會有啲咩嚴重嘢？要唔要即刻照 MRI 睇清楚？」，覺得唔照就唔安心。其實2025 年嘅指引話俾我哋知：如果冇明顯紅旗徵象🚩（例如扭傷後突然惡化、發燒🤒、體重急跌、手腳無力或麻痺加劇、夜間痛到瞓唔着🫩等），大部分頸痛喺頭幾星期都唔需要即刻做影像檢查。🔍


又或者咁講，喺西醫同物理治療嘅檢查入面，其實已經大致可以幫患者作出臨床診斷🧑🏻‍⚕️，用嚟指導治療方向。例如作為物理治療師，我會先同客人詳細問診，嘗試查找病因，再根據患者情況，幫佢做一啲特殊測試（例如 Spurling test 頸椎壓迫測試、頸椎活動度測試、肌力測試、神經張力測試等），透過有系統嘅臨床檢查，一般都已經足夠找出病因，指導往後的治療，唔係下下都一定需要照磁力共振先可以做到診斷同治療。



相反，過早照 MRI 有時反而會帶來反效果。過去都有研究證實，好多無症狀嘅人，MRI 都會見到椎間盤突出、退化、骨刺🦴等變化（20 多歲已經有 15–20% 人有類似發現，60 歲以上超過 85%）。通常患者一睇到報告寫「突出」「退化」，好容易嚇親自己，以為「條頸問題好嚴重」，甚至調返轉頭會催促醫生幫佢做手術🩺🪡。但研究顯示，呢啲變化唔一定係痛楚原因，早做 MRI 反而會增加不必要嘅焦慮、醫療開支💸，甚至不必要手術風險。


相反，先試 4–6 星期保守治療（姿勢調整、放鬆🧘🏻、針對性運動🏋🏻、痛覺教育等），大部分頸痛都會明顯好轉。有客人甚至會喺做完第一次嘅治療之後，症狀已經明顯改善，所以真係唔係個個都需要「即刻照」。指引同研究都支持呢個做法：頭幾星期先試物理治療，效果好、風險低、開支少。如果痛楚持續惡化或出現新紅旗徵象，先考慮照 MRI 或轉介專科醫生。



所以唔使一痛就驚到要即刻照 MRI，頭幾星期先試吓物理治療（例如姿勢矯正、簡單伸展、頸肩穩定訓練）通常已經有好大幫助。如果你有頸痛，又唔肯定要唔要照片🩻，最好同你嘅醫生🧑🏻‍⚕️傾清楚先～


你有冇因為頸痛而照過 MRI？歡迎留言分享一下你嘅經驗吖！💬



如欲了解更多文章內容，歡迎瀏覽本診所網站，了解更多！

📍銅鑼灣恆隆中心19樓04室

 
 
 

留言

bottom of page